ಫ್ಲಾಪಿ ಕಥೆಗಳು

ಚಿಕ್ಕಂದಿನಿಂದಲೂ ಕಾಂನ್ವೆಂಟ್ ಸ್ಕೂಲಲ್ಲಿ ಕಲಿತಿದ್ದ
ಅವನಿಗೆ ಮೂಟೆ ಹೊರುವುದು ಲೀಲಾಜಾಲ ಕೆಲಸವಾಗಿತ್ತು..!


ಅತ್ತ ಅಪ್ಪ ಅಮ್ಮ ಮಗಳಿಗೆ ಮದುವೆ ಮಾಡಲು
ಗಂಟುಗಳ ಪಟ ನೋಡುತ್ತಿದ್ದರು,
ಇತ್ತ ಮಗಳ ಪ್ರಿಯಕರನ ಜೊತೆ
ಮಾಲ್  ಗಳಲ್ಲಿ ಸುತ್ತುತ್ತಿದ್ದಳು..!


ಕನ್ನಡ ಭಾಷೆ, ಅಭಿಮಾನ ಅಂತೆಲ್ಲಾ ಭಾಷಣ ಮಾಡಿ ಮನೆಗೆ ಬಂದು,
ಮಗಳಿಗೆ ಫ್ರೆಂಚ್, ಜರ್ಮನ್ ಭಾಷೆ ಕಲಿಕೆಯ ಕೋರ್ಸ್
ಸೇರೋಕೆ ದುಡ್ಡು ಕೊಟ್ಟ


ಇತ್ತ ಅತ್ಯಾಚಾರದಿಂದ ಹತ್ಯೆಯಾಗುತ್ತಿತ್ತು
ಅತ್ತ ಸಂತಾಪ ಸಭೆಯಲ್ಲಿ ಮೇಣದ ಬತ್ತಿ
ಕರಗುತ್ತಿತ್ತು


ಬೆಳೆದು ನಿಂತ ಮಗಳ ಮೇಲೆ ಯಾರಾದರೂ ಕಣ್ಣುಹಾಕಿಯಾರೆಂದು
ಯಾವಾಗಲೂ ಮಗಳ ಸುತ್ತಲೇ ಇರುತ್ತಿದ್ದಳು
ಆದರೆ ಪಡ್ಡೆ ಹುಡುಗರ ಕಣ್ಣು ಮಾತ್ರ
ಆಂಟಿಯ ಮೈಮಾಟದ ಮೇಲೆಯೇ ಇತ್ತು


ಹೊಸ ಚಪ್ಪಲಿಯೇ ಬೇಕೆಮದು ಹಠ ಮಾಡುತ್ತಿದ್ದ ಮಗು
ಕಾಲಿಲ್ಲದವನ ನೋಡಿ ಅಳು ನಿಲ್ಲಿಸಿತು


ದೇವಸ್ಥಾನದ ನಾಲ್ಕು ಗೋಡೆಯ ಮಧ್ಯೆ
ಸಿಕ್ಕಿಹಾಕಿಕೊಂಡ ದೇವರು,
ಮಂದಿರದ ಕದ ತೆಗೆಯುವುದೇ ಕಾಯುತ್ತಿದ್ದ!


ಕಾಣದ ನಲ್ಲೆ ಇವತ್ತಲ್ಲ ನಾಳೆ ಬಂದೇ ಬರುವಳೆಂದು ಅವಾ ಕಾದ..!
ಆ ಒಂದು ದಿನ ಗಂಡನೊಂದಿಗೆ ಬರುತ್ತಿರುವ ತನ್ನ ನಲ್ಲೆಯ ಕಂಡು 'ಅವಾಕ್ಕಾದ'..!!


ಆತನೆಂದ, "ನಾಳೆಯಿಂದ ಮೂರು ದಿನ ಆಫೀಸಿಗೆ ರಜಾ.. ನನಗಂತೂ ಮಸ್ತ್ ಮಜಾ.!"
ಆಕೆಯೆಂದಳು, "ನನಗೂ ಇಂದಿನಿಂದಲೇ 'ರಜಾ', ಸಂಪ್ರದಾಯಸ್ಥ ಈ ಮನೆಯಲ್ಲಿ ಹೊರಗೆ ಕೂರುವ ಸಜಾ..!!"


ಹೋರಾಟದ ಜೀವನ ತನ್ನ ಕೈಲಿ ಅಸಾದ್ಯವೆಂದು ಆತ್ಮಹತ್ಯೆ ಮಾಡಿಕೊಂಡ.!
ಲಕ್ಷಾಂತರ ಸ್ಪರ್ಮ್ ಗಳ ಜೊತೆ ಹೋರಾಡಿಯೇ ಹುಟ್ಟಿದ್ದೇನೆ ಅನ್ನುವುದನ್ನ ನೆನೆಯಲೇ ಇಲ್ಲ..!!

ಕೆಟ್ಟದ್ದನ್ನೆಲ್ಲಾ ಸುಡಬೇಕು ಎನ್ನುತ್ತಾ ಆತ ಸಿಗರೇಟು ಬಾಯಲ್ಲಿಟ್ಟು ಸುಟ್ಟ..!
ಅವನು ಸುಟ್ಟ ಸಿಗರೇಟು ಅವನನ್ನೇ ಸುಡುತ್ತೆ ಅನ್ನೋದನ್ನ ಮರೆತಿದ್ದ..!!

ಪ್ರತಿಭಟನೆಯ ಸಂದರ್ಭದಲ್ಲಿ ಹತಾಷೆಗೊಂಡಿದ್ದ ಆತ ವಿಷ ಸೇವಿಸಿ ವಿಲವಿಲನೆ ಒದ್ದಾಡುತ್ತಿದ್ದ..!
ಮಾಧ್ಯಮದವರು ಬ್ರೇಕಿಂಗ್ ನ್ಯೂಸ್ ಗಾಗಿ ಪಟಪಟನೆ ವಿಡಿಯೋ ಮಾಡುತ್ತಿದ್ದರು..!!


ಬೇರೆಯವರನ್ನು ಹಿಡಿದು ಹಾಕಲೆಂದು ಅವನು ತೋಡಿದ್ದ ಖೆಡ್ಡಾದಲ್ಲಿ ಅವನಿಗರಿವಿಲ್ಲದೇ ಅವನೇ ಬಿದ್ದ..!!